A Asociación Hostalaría Compostela lamenta todos os problemas e confusións que está supoñendo para a clientela de bares e restaurantes a interpretación da nova normativa da Xunta de Galicia que obriga a utilizar a máscara nos locais excepto durante o tempo exclusivo de consumo.

A entidade considera que esta medida non é susceptible de poder cumprirse. Pensar que alguén pode estar comendo e retirando a máscara para meter o bocado na boca e posteriormente volver a colocala, demostra a falta de capacidade de entender a realidade.

Reclamamos que se retome esta interpretación e que se considere o tempo exclusivo de consumición mentres esta non se remate, da mesma maneira que excluír a obrigatoriedade do uso da máscara durante o tempo da comida.

Hostalaría recorda que os locais están obrigados e cumpren ademais unhas estritas normas de distanciamento físico entre mesas, o que garante a seguridade entre persoas que non pertencen ao mesmo grupo.

A Asociación destaca tamén que as trabas de consumo no interior e exterior dos locais levan a optar por outro tipo de xuntanzas en espazos privados onde non hai ningún tipo de control, como son as comidas familiares en domicilios privados que están a ser unha das principais causas das repuntas da COVID 19.

Lamentamos as inspeccións que en varios lugares se están a dar con esta interpretación restritiva e que de ser de maneira xeneralizada abocan o sector ao peche definitivo, sector que lembramos, representa o 20% do noso PIB e que xa está enormemente damnificado. “Facemos un chamamento a regular un máis que necesario equilibrio entre a seguridade sanitaria, a nosa, a dos nosos equipos de traballo e a da nosa clientela, e a posibilidade do mantemento dos nosos negocios, para manter así os postos de traballo que xeran e poder facer fronte aos impostos que pagamos”, sinalan na Xunta Directiva.

O sector apela á responsabilidade individual como máximo garante da contención do virus. 

Leave a Reply

Your email address will not be published.

Este sitio usa Akismet para reducir el spam. Aprende cómo se procesan los datos de tus comentarios.